COLLEGE SAINT ANDRE: HAKOZWE IGIKORWA CYO GUKANGURIRA ABANYESHURI KURWANYA IBIYOBYABWENGE

Ku wa 6 Ugushyingo 2026, kuri Collège Saint André habereye igikorwa cyo gukangurira abanyeshuri kwirinda ibiyobyabwenge, kibashishikariza no gushinga ihuriro ryiswe Drug-Free Generation Club, rizafasha guteza imbere umuco wo kwirinda ibiyobyabwenge no kubaka urubyiruko ruzira ingeso mbi. Iki gikorwa cyateguwe n'Ibiro by'Umuvugizi wa Guverinoma, ku bufatanye na Minisiteri ya Siporo (MINISPORTS), Minisiteri y'Uburezi (MINEDUC), Urwego rushinzwe Uburezi bw'Ibanze (REB) ndetse n'itsinda ry'urubyiruko rya Sober Generation Youth. Muri iki gikorwa, abanyeshuri bahawe ubutumwa n'abatumirwa batandukanye barimo umuhanzi Riderman, Dr. Nkeshimana Menelas, Capt. Arielle Sekamana, Umuyobozi Mukuru wungirije wa REB, Umujyanama Mukuru mu bya Tekiniki muri MINEDUC ndetse n'Umunyamabanga wa Leta muri Minisiteri ya Siporo. Iki gikorwa cyatangijwe n'umukino wa Basketball wahuje ikipe ya Collège Saint André n'ikipe ihagarariye urubyiruko rw'abahanzi n'ibyamamare. Uyu mukino wari ugamije guteza imbere ubufatanye, ubusabane n'imibanire myiza hagati y'urubyiruko. Mu butumwa bwatanzwe, abanyeshuri basobanuriwe ingaruka mbi ziterwa n'ikoreshwa ry'ibiyobyabwenge ku buzima, ku myigire no ku hazaza habo. Bashishikarijwe gufata ibyemezo biboneye, kwirinda ibishobora kubangiriza ubuzima no kugira uruhare rugaragara mu kubaka umuryango w'urubyiruko rudafite aho ruhuriye n'ibiyobyabwenge. Abanyeshuri, abarezi n'abandi bitabiriye iki gikorwa bakiriye neza ubutumwa bwatanzwe. By'umwihariko, abanyeshuri bagaragaje ko bungutse ubumenyi n'ubushishozi ku ngaruka z'ibiyobyabwenge ndetse n'akamaro ko kubyirinda, biyemeza kugira uruhare mu guteza imbere ubuzima bwiza n'imibereho myiza mu rubyiruko. Iki gikorwa ni intambwe ikomeye mu gukomeza kubaka ishuri ritanga ubumenyi n'uburere, rifasha abanyeshuri gukura bafite indangagaciro, ubushobozi bwo gufata ibyemezo byiza no guharanira ahazaza heza. Ubutumwa bw'ingenzi: “Stay Sober, Stay Dignified” — Irinde ibiyobyabwenge, uharanire icyubahiro cyawe. Collège Saint André: Duharanira uburezi bufite ireme, indangagaciro n'urubyiruko rufite ahazaza heza.