Ishyirwaho ry'Ihuriro ry'Abize muri Collège Saint André

Kuri iki Cyumweru, tariki ya 10 Gicurasi 2026, abize muri Collège Saint André i Nyamirambo muri Arkidiyoszi ya Kigali bibumbiye mu ihuriro rya CSA (Ihuriro ry’abize muri Collège Saint André) bahuriye hamwe mu munsi mukuru ugamije kongera gushimangira ubumwe n’ubusabane bibaranga. Uyu munsi mukuru ubimburiwe n’Igitambo cya Misa muri Paruwasi Mutagatifu Karoli Lwanga, kiyobowe na Nyiricyubahiro Antoine karidinali Kambanda. Uyu munsi mukuru wari ufite intego ebyiri zikomeye: Gushyiraho ku mugaragaro Ihuriro ry'abize muri Collège Saint André no kwizihiza isabukuru y'imyaka 50 Padiri Kibaguka André amaze ahawe isakaramentu ry'Ubusaseridoti. Ibirori byabimburiwe n'Igitambo cya Misa , hakurikiraho ijambo ry'ikaze ryahawe abashyitsi bose bari baturutse impande zose z'igihugu ndetse n'abandi bari baturutse mu mahanga. Mu majwi arangurura, basubiyemo indirimbo yubahiriza ishuri ryabo, bibutsa buri wese indangagaciro za gikirisitu n'uburere bwiza baharerewe aho abahateraniye bemeje bidasubirwaho ishyirwaho ry'Ihuriro ry'Abize muri Collège Saint André. Hasomwe amategeko shingiro agenga iri huriro, hagaragazwa ko intego nyamukuru ari uguhuza imbaraga kugira ngo bashyigikire iterambere ry'ishuri ryabareze, ndetse no gufashanya hagati yabo. Hahise hakurikiraho igikorwa cyo gutora komite nyobozi. Mu mutuzo n'ubwumvikane, abanyamuryango batanze abakandida maze batora Komite igizwe na: Perezida w'Ihuriro: Ushinze guhuza ibikorwa byose no guhagararira ihuriro. Visi Perezida: Wungiriza mu mirimo yose no gukurikirana imishinga y'iterambere iterwa inkunga n'abize mu kigo. Umunyamabanga n'Umubitsi: Bashinzwe imicungire y'umutungo n'inyandiko z'ihuriro. Abajyanama: Batoranyijwe mu byiciro bitandukanye by'imyaka kugira ngo bahuze ibisekuruza byose byanyuze muri iri shuri. Abatowe bahawe amashyi y'urufaya, barahirira kuzakorana umurava no kusa ikivi batangiye. Ibyishimo byakomeje kwiyongera ubwo hageraga umwanya utegerejwe na benshi wo kwizihiza Yubile y'Imyaka 50 y'ubusaseridoti (Golden Jubilee) bwa Padiri Kibaguka André. Umusaza witanze mu kurera no kuyobora roho za benshi mu bari aho. Bagize bati : "Padiri Kibaguka, mu myaka 50 umaze uri umukozi w'Imana, ntiwigeze uba umusaseridoti gusa, ahubwo wabaye umubyeyi wacu. Wadatutoje ubumenyi, ubutwari mu byo dukora, uduha uburere bwiza n'indangagaciro zatumye tuba abo turi bo uyu munsi. Iri huriro dushyizeho uyu munsi, ni umusaruro w'imbuto wateye muri twe." Padiri Kibaguka yashyikirijwe impano zitandukanye zaguzwe mu bushobozi bwakusanyijwe n'abanyeshuri yareze, harimo n'ishusho yibutsa imyaka mirongo itanu y'ubwitange bwe. Mu ijambo rye rito ariko ryuje ubwenge, yasabye abize muri Collège Saint André gukomeza kurangwa n'urukundo n'ubumwe, kandi bagahora bibuka gusubiza amaso inyuma bagafasha barumuna babo. Ibirori byakomereje mu busabane budasanzwe bw'uwo mugoroba wo ku Cyumweru. Habayeho gukata umutsima w'ibirori (Cake), basangira amafunguro n'ibyo kunywa. Muri ubu busabane, abantu bibukanyije utuntu twose twabaranze bakiri abanyeshuri kuva ku bakoze amakosa bagahanwa, kugeza ku bihe byiza by'imikino n'amasomo. Byari ibyishimo bisendereye, abantu bataha mu masaha y'umugoroba biyemeje ko Ihuriro ry'Abize muri Collège Saint André rigomba kuba umuyoboro w'ibikorwa byiza, kandi ko amateka n'umurage mwiza basigiwe n'aba Padiri bizahora bibungabunzwe ibihe byose.